BUD vs TVP vs EMF 點揀？三大熱門資助計劃全面比較
BUD Fund、TVP 科技券、EMF — 三個最熱門嘅政府資助，但好多老闆搞唔清邊個啱自己。呢篇一張表幫你睇晒分別。
一表睇晒三大資助
| BUD Fund | TVP 科技券 | EMF | |
|---|---|---|---|
| 全名 | 發展品牌、升級轉型及拓展內銷市場專項基金 | 科技券計劃 | 中小企業市場推廣基金 |
| 最高金額 | 每項目 $100萬 · 累計 $700萬 | 累計 $60萬 | 每次 $10萬 · 累計 $100萬 |
| 配對比例 | 50%（你出一半） | 75%（你出 25%） | 50%（你出一半） |
| 最適合 | 品牌建立、打入新市場 | 買科技系統、數碼升級 | 參展推廣、落廣告 |
| 適用行業 | 所有行業 | 所有行業 | 所有行業 |
| 申請難度 | 中高（要寫詳細計劃書） | 中（要 3 份報價） | 低（最簡單） |
| 審批時間 | 3-4 個月 | 2-3 個月 | 1-2 個月 |
| 管理機構 | 工業貿易署 | 創新科技署 | 工業貿易署 |
| 截止日期 | 全年接受 | 全年接受 | 2026年6月30日 |
| 上限項目數 | 冇限制（累計 $700 萬為止） | 最多 6 個 | 冇限制（累計 $100 萬為止） |
點樣揀？決策流程
情況 A：你想參展／落廣告
如果你純粹想參加一個海外展覽，或者做一轉 Google Ads 推廣 → 揀 EMF。手續最簡單，批得最快。
情況 B：你想買個系統（ERP／CRM／網店）
如果你想 upgrade 公司嘅科技設備 → 揀 TVP。政府出 75%，你自己只係俾 25%，係咁多個計劃入面配對比例最高。
情況 C：你想打入一個新市場（內地／東盟）
如果你有一個比較大嘅市場拓展計劃，例如想喺日本建立品牌、喺內地開銷售渠道 → 揀 BUD Fund。每個市場可以獨立申請一個項目。
情況 D：你做緊品牌 overhaul
如果你做緊成個品牌重新包裝、新 logo、新網站、同時又要參展又要推廣 → BUD Fund + EMF 一齊用。BUD 包品牌策略，EMF 包個別推廣活動。（記住同一筆開支唔可以兩邊 claim）
情況 E：你同時要系統同市場推廣
如果你的情況係又要買 ERP（TVP）、又要參展（EMF）、又要搞品牌（BUD） → 三個可以分開申請。只要係唔同開支項目，三個計劃係獨立嘅，冇衝突。
重點：三個計劃可以同時申請！只要確保每筆開支只 claim 一個計劃就得。唔少公司同時有 BUD + TVP + EMF 三個 active project。
真實例子：一間貿易公司點樣用盡三個計劃
假設你係一間 15 人嘅貿易公司，想做以下嘢：
- 買 ERP 系統（開支 $200,000）→ 申請 TVP，政府出 $150,000，你出 $50,000
- 參加德國展覽（開支 $80,000）→ 申請 EMF，政府出 $40,000，你出 $40,000
- 開發日本市場（品牌建立＋當地推廣）（開支 $400,000）→ 申請 BUD Fund（自貿協定計劃），政府出 $200,000，你出 $200,000
總計：你實際攞到政府 $390,000 資助，自己總支出 $290,000。